E mapa (un plan) di Ministerio di Desaroyo teritorial, Infrastructura y Medio Ambiente (MinROIM)
ta forma e base di pasonan cu lo tuma durante periodo di gobernacion di Gabinete Evelyna Wever-
Croes I. Meta di e documento aki ta pa brinda un bista riba prioridadnan di ministerio y e fundeshi
cu a duna forma na e prioridadnan aki. Importante ta pa tuma nota di cu e punto di salida di e plan
aki ta e programa di gobernacion ‘ Hunto pa Aruba’ den cua e balornan ‘integridad, transparencia y
pone e ser humano central’ , ta forma parti di e vision y criteria nucleo di ministerio, ta e motor tras di
cada accion y decision cu lo tuma. Un aspecto cardinal pa ministerio ta e responsabalidad pa
informa comunidad corectamente di tema- y pasonan importante. Asina contribui na fomenta den
cada habitante e habilidad pa ta critico den forma constructivo y crea conscientisacion di tanto
derechonan como debernan.
MinROIM ta considera participacion activo di tur esnan cu ta biba na Aruba cardinal pa por yega na
e metanan stipula. E creencia firme di ministerio ta pa stimula desaroyo teritorial responsabel den
forma balansa y cu respet pa e recursonan natural di Aruba y su medio ambiente.
E mapa aki ta un documento di trabou cu ta forma punto di salida di ministerio y lo wordo adapta
den transcurso di tempo conforme contribucion cu ministerio ta ricibi di diferente actor. Pa di e
forma aki sigura un maneho dinamico, inclusivo y participativo.
Den e siguiente seccionnan lo elabora riba e mapa di ministerio.
